سولې لوظنامه او مستقبل کښې افغانستان کښې مداخلت نه کولو توافق د طالبانو او افغان اولس بريا ده،مولوي هيبت الله

امريکې سره ګټه ور مذاکراتو ثابته کړه چې د هر يوې کړکيچن مسئلې حل راويستل ممکن دي،هيڅوک دې د طالبانو نه ويره نه لري مونږ ټول بخښلي دي،دوحه مذاکراتو په حواله د طالبانو د مشر بيان

دوحه کښې د امريکې سره امن لوظنامه لاس ليک کيدو وروستو د طالبانو مشر ملا هيبت الله اخندزاده لخوا جاري شوي بيان کښې د دې معاهدې هرکلي شوېدے

بيان کښې ملا هيبت الله په طالب جنګيالو غږ کړېدے چې امريکې سره شوې امن لوظنامې دې پاسداري وکړي

بيان کښې هغه دا هم وئيلي دي چې طالبانو سره چې هر چا هم مخالفت ښودلي دے دوي دې د اسلامي امارت نه هيڅ ډول ويره نه لري مونږ ټول معاف کړيدي

په خپل بيان کښې ملا هيبت الله دوحه مذاکراتو کاميابۍ کښې کردار ادا کولو باندې د قطر د امير او پاکستان پشمول د نورو هيوادونو شکريه ادا کړېده

 

د طالبانو د مشر ملا هيبت الله د بيان مکمل تفصيل 

بسم الله الرحمن الرحیم

اللَّهُ أَكْبَرُ كَبِيرًا وَالْحَمْدُ لِلَّهِ كَثِيرًا وَسُبْحَانَ اللَّهِ بُكْرَةً وَأَصِيلًا.

  الحمد لله الذي صدق وعده ونصر عبده و اعز جنده وهزم الأحزاب وحده والصلوة والسلام على من لانبي بعده وعلى اله واصحابه الذين نشروا دينه، امابعد: 

د ۲۰۰۱ م کال د اکتوبر په ۷ مه نیټه چي زموږ په خاوره د امریکا په مشری ائتلاف تجاوز کړی وو، اسلامي امارت د الله تعالی په نصرت، د افغان میړني ولس په استازولۍ په دې وتوانید چې له شا او خوا نولسو کلونو جهاد او مبارزې وروسته بالآخره د افغانستان څخه داشغال د خاتمې لپاره توافق ته ورسیږي.

دا بریا د ټول مسلمان او مجاهد ولس، وروڼو او خویندو مشترکه  بریا ده چې نیږدې دوه لسیزې يې په سر او مال خورا درنې او تاریخي قربانۍ ورکړې دي.

له افغانستان څخه د ټولو بهرنیو ځواکونو د بشپړ وتلو او په راتلونکي کې د هیڅ ډول مداخلې د نه کولو توافق یوه لویه بریا ده.

اسلامي امارت د دغې سترې کامیابۍ په مناسبت د ولس بیلابیلو اقشارو، په خاص ډول مجاهدینو، د شهیدانو کورنیو، زندانیانو، ټپيانو، معیوبینو، مهاجرینو او ټول ولس ته د زړه له کومې مبارکي وايي او دا خورا لویه فتحه د الله تعالی د نصرت او د مجاهدینو د سرښندنو، د خپل ملت د اخلاص، هلو ځلو، ستړیاوو او قربانیو نتیجه بولي.

 غواړم د دغې سترې بریا څخه د را وروسته حالاتو په اړه د مجاهدینو او ټول ملت توجه لاندې ټکو ته را  واړوم:

ــ له امریکا يي جهت سره د اشغال د پای ته رسیدو په سر توافق چې په نتیجه کې یې زموږ ولس له اشغال څخه نجات پیدا کوي، خورا مهمه بریا  او د الله تعالی ځانګړی احسان، نصرت او لوی انعام دی، موږ باید دا کامیابي د چا کمال ونه بولو بلکې د الله تعالي انعام او د ټول مجاهد ولس د قربانیو محصول یې وګڼو.

ــ د اسلامي امارت لخوا له امریکايي جهت سره شوي توافقات چې د شرعي اصولو په پام کې نیولو سره ترسره شوي او د نړیوالو معیارونو سره هم برابر دي، د ټولو مجاهدینو او افغان ولس لخوا عهد او وعده شوه چې په ټولو باندې يې عملي کول لازم دي، د اسلامي امارت هيڅ یو مسئول او فرد او په مجموع کې هيڅ هیوادوال باید د دغو توافقاتو نقض ونه کړي او په دې اړه ټول ځانونه مکلف وبولي، ځکه په اسلام کې غدر او فریب ځای نه لري او لویه ګناه بلل کیږي، البته که د مقابل لوري له خوا د توافقنامې مخالفت او نقض وشي نو ټول ولس به بیا هم د تیر په څیر کلکې دفاع ته آماده وي.

ــ د افغانستان مسلمان ملت خصوصا مجاهدین به د تر لاسه شوو بریاوو په اړه د الله تعالی شکر ادا کوي، ځانونه به لا ډیرې تقوا، امانتدارۍ او دیانت ته متعهد بولي، له تکبر، غرور، په نورو ځان برتره ګڼلو او ځان مستحق یا ممتاز بللو څخه به په کلکه ځان ساتي، ځکه دا د جهاد او فتحې له روح سره په تضاد کې دي.

ــ له امریکایي جهت سره بریالیو مذاکراتو ثابته کړه چې هر وړ پیچلو موضوعاتو ته حل لاره موندل کیدای شي، د دې مذاکراتو بریا د اسلامي امارت له اړخه ټولو داخلي اړخونو ته دا پیغام لیږدوي چې موږ د یوه معقول او عادلانه حل لپاره چمتو یو، را ځئ د خپل ولس د دیني او ملي معیارونو په رڼا کې د مسائلو د حل لپاره تلاش وکړو، د کابل اداره دې هم د ولس له مخالفته لاس واخلي.

ـــ اسلامي امارت د ټولې نړۍ او په تیره بیا د سیمې له هیوادونو سره په دوه اړخیزو مثبتو اړیکو باور لري او له ګاونډیانو سره د ښه ګاونډیتوب اصولو ته ژمن دی.

ـــ موږ خپل ځوریدلي ولس ته ډاډ ورکوو چې د عادلانه او واقعي اسلامي نظام په سیوري کې به د هیواد ټولو نارینه او ښځینه وو ته  د هغوی حقه حقوق ورکول کیږي.

ـــ د اسلامي امارت په مخالفت کې چې چا برخه اخیستې وي او په عموم کې هرهغه څوک چی د اسلامي امارت څخه تشویش لري، زموږ له طرفه په تیرو ټولو اعمالو ورته عفوه او بخشش دی، د راتلونکي لپاره ورته د اسلامي اخوت،  ملي وحدت او ښه ژوند غوښتنکي یو.

ـــ اسلامي امارت به د معیاري (دیني او عصري) تعلیم، کار، تجارت، ترقي ، آبادۍ او په ټولو اجتماعي برخو کې د پرمختګ  زمینه سازي کوي، ځکه دا د افغانانو بنیادي حق او زموږ د هیواد د پرمختګ او د ولس د ښیرازي او هوسایي لپاره  حیاتي او لازمي اړتیا ده.

ـــ د اسلامي امارت مجاهدین دي خپل صفونه نور هم منظم، فعال او پیاوړي کړي تر څو خپل لوی هدف ته چې د اشغال د بشپړې خاتمې وروسته د اسلامي نظام قیام او د ولس سوکالي ده ورسیږي او په راتلونکي کې د هر ډول بدو پېښو مخنیوی، د اسلامي نظام حفاظت او د سرتاسري سولي او امن د ټینګېدو په لاره کې له احتمالي خطرونو سره مقابلې او د ولس خدمت ته چمتو وي.

ـــ اسلامي امارت د مؤمن ولس له بیلابیلو اقشارو علماء کرامو، قومي مخورو، منورینو، پوهانو، استادانو، شاګردانو او عام  ولس څخه غوښتنه کوي، لکه څنګه چې د اشغال د خاتمې په کار کې په پوره اخلاص د خپلو مجاهدینو وروڼو سره ودریدل، دغه راز د داخلي موضوعاتو د حل په برخه کې هم خپل اتحاد او همکاري جاري وساتي تر څو دغه پړاو هم د بریا منزل ته ورسیږي او افغانستان له عادلانه اسلامي نظام او سولې څخه برخمن شي.

ــ په اخر کې د قطر هیواد او د هغه له محترم امیر شیخ تمیم بن حمد آل ثاني څخه مننه  کوم چي د مذاکراتو لپاره یې سهولتونه برابر کړي او په اخلاص سره یې له دې پروسې سره مرسته کړې ده. همدارنګه، د پاکستان، ازبکستان، چین، ایران، روسېې، انډونیزیا، ترکمنستان، کرغیزستان، عربي متحده امارات او نورو ټولو هیوادونو څخه چې د مذاکراتو په بهیر کې یې مرسته کړې مننه کوم او کور ودانۍ ورته وایم.  والسلام

د افغانستان اسلامي امارت زعیم امیرالمؤمنین شیخ الحدیث مولوي هبة الله اخند زاده

۵/۷/۱۴۴۱هـ ق

۱۰/۱۲/۱۳۹۸هـ ش ــ 2020/2/29م

 

 

بايد تاسي دا هم خوښ کړيي

ځواب ورکئي

آپ کا ای میل ایڈریس شائع نہیں کیا جائے گا.